Event report

Il-Kap Eżekuttiv ta’ Servizzi Ewropej f’Malta, Mandy Falzon, spjegat kif permezz ta’ Pjattaforma Diġitali Multilingwi – www.futureu.europa.eu – ċittadini madwar l-Ewropa jistgħu jressqu l-veduti tagħhom fuq xi suġġett li jqisu li hu importanti għall-Unjoni Ewropea. Għall-ewwel darba fuq livell Ewropew, dan jagħti l-possibiltà liċ-ċittadini biex iressqu l-ideat tagħhom, jikkummentaw fuq ideat ta’ oħrajn, u joħolqu jew jieħdu sehem f’attivitajiet organizzati. Dan kollu se jkun qiegħed jikkontribwixxi f’fora plenarji li huma l-Panels taċ-Ċittadini Ewropej u l-Plenarji tal-Konferenza, li minnhom joħorġu r-rakkomandazzjonijiet aħħarija tal-Konferenza. L-eżitu aħħari tal-Konferenza jiġi ppreżentat f’rapport lill-Presidenza Konġunta. It-tliet istituzzjonijiet imbagħad jeżaminaw l-aħjar mod kif jimxu fuq ir-rapport b’mod effettiv, skont il-kompetenzi tagħhom u skont it-Trattati. Dwar il-programm nazzjonali, il-Kap Eżekuttiv ta’ SEM qalet li dan se jkun jikkonsisti f’dibattiti u diskussjonijiet fuq diversi temi fosthom, l-ambjent u t-tibdil fil-klima, l-ekonomija wara l-pandemija, l-edukazzjoni, l-immigrazzjoni, u r-rwol ta’ Malta fil-periferija tal-Ewropa. Se jkunu mħeġġa wkoll l-attivitajiet mill-organizzazzjonijiet tas-soċjetà ċivili u se jsiru wkoll attivitajiet mat-tfal matul Skolasajf u mal-studenti u ż-żgħażagħ, sabiex anki huma jkunu involuti f’dan il-proċess. https://sem.gov.mt/events-and-activities/tnedija-fmalta-tal-konferenza-dwar-il-futur-tal-ewropa/