Il-Konferenza dwar il-Futur tal-Ewropa hija opportunità unika u f’waqtha għaċ-ċittadini Ewropej biex ikollhom dibattitu dwar l-isfidi u l-prijoritajiet tal-Ewropa. Irrispettivament minn fejn int jew x’tagħmel, dan huwa l-post biex taħseb x’futur trid għall-Unjoni Ewropea.

Il-Parlament Ewropew, il-Kunsill u l-Kummissjoni Ewropea impenjaw ruħhom li jisimgħu lill-Ewropej u li jagħtu segwitu lir-rakkomandazzjonijiet li saru fl-isfera tal-kompetenzi tagħhom. 

Sar-rebbiegħa tal-2022, il-Konferenza mistennija tasal għal konklużjonijiet biex tipprovdi gwida dwar il-futur tal-Ewropa.

Min jista’ jieħu sehem?

Iċ-ċittadini Ewropej, minn kull qasam tal-ħajja u minn kull rokna tal-Unjoni, biż-żgħażagħ Ewropej jaqdu rwol ċentrali fit-tiswir tal-futur tal-proġett Ewropew. 

L-awtoritajiet Ewropej, nazzjonali, reġjonali u lokali, kif ukoll is-soċjetà ċivili u organizzazzjonijiet oħra li jixtiequ jorganizzaw avvenimenti u jikkontribwixxu ideat.

Il-parteċipanti kollha għandhom jirrispettaw il-valuri stabbiliti fil-Karta tal-Konferenza tagħna. 

X'inhuma l-komponenti tal-Konferenza?

• Pjattaforma diġitali multilingwi – se tkun il-post fejn iċ-ċittadini jaqsmu l-ideat tagħhom u jibagħtu s-sottomissjonijiet online. Dawn jinġabru, jiġu analizzati, immonitorjati u ppubblikati matul il-Konferenza;
• Avvenimenti deċentralizzati – avvenimenti virtwali u wiċċ imb wiċċ organizzati min-nies u mill-organizzazzjonijiet, kif ukoll mill-awtoritajiet nazzjonali, reġjonali u lokali fl-Ewropa kollha;
• Il-Panels taċ-Ċittadini Ewropej – il-bordijiet jiddiskutu suġġetti differenti u jressqu r-rakkomandazzjonijiet tagħhom; huma rappreżentattivi f'termini tal-oriġini ġeografika, il-ġeneru, l-età, l-isfond soċjoekonomiku u/jew il-livell ta’ edukazzjoni;
• Plenarja tal-Konferenza – dan jiżgura li r-rakkomandazzjonijiet mill-panels nazzjonali u Ewropej taċ-ċittadini, miġbura skont it-temi, jiġu diskussi mingħajr eżitu predeterminat. 

Min qed imexxi l-Konferenza?

Il-Konferenza titqiegħed taħt l-awtorità tat-tliet istituzzjonijiet, rappreżentati mill-President tal-Parlament Ewropew, il-President tal-Kunsill u l-President tal-Kummissjoni Ewropea, li jaġixxu bħala l-Presidenza Konġunta tagħha.

Il-Presidenza Konġunta hija appoġġata minn Bord Eżekuttiv, li huwa kopresedut mit-tliet istituzzjonijiet tal-UE (is-Sur Guy Verhofstadt, Membru tal-Parlament Ewropew, is-Sur Clément Beaune, Segretarju tal-Istat għall-Affarijiet tal-UE għall-Presidenza Franċiż tal-Kunsill* u s-Sinjura Dubravka Šuica, Viċi President tal-Kummissjoni Ewropea responsabbli għad-Demokrazija u d-Demografija). 

Segretarjat Komuni, ta’ daqs limitat u magħmul minn uffiċjali li jirrappreżentaw it-tliet istituzzjonijiet b'mod ugwali, jassisti l-ħidma tal-Bord Eżekuttiv.

X'se jkun ir-riżultat tal-Konferenza?

L-eżitu finali tal-Konferenza ser jiġi ppreżentat f'rapport lill-Presidenza Konġunta. It-tliet istituzzjonijiet ser jeżaminaw malajr kif isegwu b'mod effettiv dan ir-rapport, kull waħda fl-isfera tal-kompetenzi tagħha u f'konformità mat-Trattati.

X’inhu r-rwol ta’ din il-pjattaforma diġitali?

Il-pjattaforma diġitali hija ċ-ċentru tal-Konferenza: hija l-mod kif tista’ tinvolvi ruħek u ssemma’ leħnek fil-Konferenza. Hawn tista’ taqsam il-ħsibijiet tiegħek dwar l-Ewropa u l-bidliet li jeħtieġ li jseħħu, tara x’għandhom x'jgħidu l-oħrajn, issib attivitajiet qrib tiegħek, torganizza l-attività tiegħek stess u ssegwi l-progress u l-eżitu tal-Konferenza.  

Kif issemma’ leħnek? 

Sempliċiment agħżel mill-firxa komprensiva ta' suġġetti, u semma’ l-fehma tiegħek lill-Konferenza. L-ideat tiegħek jinġabru, jiġu analizzati, jiġu mmonitorjati u jiġu ppubblikati fuq il-pjattaforma matul il-Konferenza. Dawn imbagħad jikkontribwixxu fid-diskussjonijiet li jkunu qed isiru fil-Panels taċ-Ċittadini Ewropej u fil-Plenarji. L-eżitu finali tal-Konferenza se jiġi ppreżentat f’rapport lill-Presidenza Konġunta. It-tliet istituzzjonijiet se jeżaminaw malajr kif isegwu b’mod effettiv dan ir-rapport, kull waħda fl-isfera ta' kompetenzi tagħha u f’konformità mat-Trattati.

Ara wkoll: Kif nista’ ninvolvi ruħi?

Il-Konferenza dwar il-Futur tal-Ewropa mhi xejn mingħajrek u l-involviment tiegħek f’din il-pjattaforma. Il-futur f’idejk.

Semma’ leħnek.

Dokumenti relatati

Dikjarazzjoni Konġunta dwar il-Konferenza dwar il-Futur tal-Ewropa

Regoli ta' Proċedura tal-Konferenza dwar il-Ġejjieni tal-Ewropa

Id-Dikjarazzjoni ta' Schuman – 9 ta' Mejju 1950

It-trattati tal-UE